Mwenyekiti wa Yanga, Yusuf Manji.
TP
Mazembe ndiyo klabu bora zaidi Afrika. Ubora wa klabu hiyo unatokana na
miundombinu yake pamoja na utajiri na uwekezaji wa bilionea Moise
Katumbi.
Tajiri
huyo ameiwezesha timu hiyo kusajili wachezaji bora wa ndani na nje ya
Afrika ambao pia wamemuwezesha kucheza Klabu Bingwa ya Dunia kwa mara
mbili.
Mwenyekiti
wa Yanga, Yusuf Manji, ametamka kwamba atagombea nafasi yake kwa mara
nyingine na ni lazima ahakikishe Yanga inafanya kitu kipya kwenye Ligi
ya Mabingwa Afrika kama Mazembe ya Katumbi na haoni sababu ya kushindwa.
Manji
amesisitiza kwamba tayari Yanga ina wachezaji wa maana na aliowanunua
kwa fedha nyingi kama anavyofanya Katumbi, lakini ambacho bado ni
kutengeneza uwanja wa maana wa Yanga pamoja na kuhakikisha inatisha
kwenye Ligi ya Mabingwa Afrika hata zaidi ya Mazembe.
Kiongozi
huyo amesisitiza kwamba atatimiza mipango hiyo kwa kugombea kwa mara
nyingine ndani ya Yanga na vilevile kutumia nguvu yake ya kisiasa
kuishawishi serikali ili kuharakisha ujenzi wa uwanja huo na kuiimarisha
Yanga kiuchumi.
Akitumia
dakika 40 katika kueleza sababu ya kujiuzulu kwa Katibu wake Dk. Jonas
Tiboroha Manji alisema: “Nitagombea, kama kuna mtu anataka kugombea
asiogope aje tu tushindane mimi siogopi changamoto, lakini hata kama
nikishinda sidhani kama nitamaliza kipindi changu, kuna mambo machache
hasa hili la uwanja ndiyo ninalotaka kulipigania.
“Hatuwezi
kufanya vizuri katika mashindano haya makubwa kama hatuna uwanja hata
wa mazoezi, naona kuna watu wamejenga kule mbele lakini Yanga tulizuiwa
hiyo si sawa.”
“Nimeweka
dhamira ya uchaguzi ufanyike kwa haraka, katika maisha yangu sijawahi
kutanguliza au kupigania cheo, ndani ya Yanga maendeleo yanaonekana
lakini wapo watu ndani ya Yanga wanaona mandeleo yapo kwake. Basi tuache
demokrasia itawale, lakini na mimi nitatangaza kugombea tena nafasi
hiyo.”
ISHU YA TIBOROHA
Manji
ametoa ufafanuzi juu ya sakata la kujiuzulu kwa aliyekuwa Katibu Mkuu
wa klabu hiyo, Dokta Jonas Tiboroha. Miongoni mwa mambo aliyozungumza
mwanasiasa huyo ni pamoja na suala ya Tiboroha kuipotosha Kamati ya
Utendaji kuhusiana na sakata la Haruna Niyonzima.
NIYONZIMA
“Baada
ya kuupitia uamuzi wa Kamati ya Nidhamu kuamua sababu kuvunja mkataba
kati ya klabu Yanga na mchezaji Haruna Niyonzima, nilihisi kulikuwa kuna
kasoro hasa kwa mchezaji anayelipwa mshahara wa Sh6 milioni anaweza
vipi kupuuzia maisha yake na kuanzisha mgogoro usiokuwa na tija kwa
maisha ya kipato,” alisema.
“Niliamua
uchunguzi wa ndani ufanyike katika suala hilo zima na mwisho, Jonas
Tiboroha alibainika kuwa hakuwasilisha ushahidi wa mawasiliano sahihi
kwa Kamati ya Nidhamu kuhusiana na Haruna Niyonzima, hali iliyosababisha
kamati kuchukua uamuzi ambao haukuwa sahihi kwa sababu; Kulifanyika
mambo ambayo hayakuwa sahihi, mfano barua za Niyonzima kutoka kwa
Shirikisho la Soka la Rwanda (Ferwafa) ambazo zilitumwa TFF na
kupokelewa kama ambavyo Azam FC walipokea ya mchezaji wao kupitia kwa
Afisa Mtendaji Mkuu wao. Lakini barua ya Niyonzima kuja Yanga,
ilionekana haikupokewa kama ilivyokuwa kwa barua yake ya utetezi na ile
ya kuomba radhi alizoandika, nazo zilipokewa lakini hazikuwasilishwa
kwenye Kamati ya Nidhamu na hili, mhusika ni Tiboroha.”
Kamati
ya Utendaji (Excom), bada ya kupitia kwa kina iliona uamuzi iliouchukua
haukuwa wa haki kutokana na kupotoshwa na Tiboroha.”
MAPATO
“Ndani
ya miezi yake 12 ya uongozi amechangia kushuka kwa kasi kubwa kwa
mapato ya klabu huku matumizi ya klabu yakipanda mara nne zaidi kutoka
Sh milioni 500 kwa mwaka hadi sasa takriban Sh2 bilioni.
GHANA
“Wakati
Fifa ilipoialika Yanga kwenye semina ya mafunzo iliyofanyika Ghana,
Tiboroha alijichagua mwenyewe asafiri kwa niaba ya klabu bila kuitaarifa
kamati, halafu akachukua “Cheti cha ugonjwa” na kukiwasilisha kwa
mwajiri wake Yanga ili apate nafasi ya kusafiri kwenda nchini Ghana.
Kujichagua yeye mwenyewe, ilikuwa ni kutofuata weledi.
DAKTARI
“Daktari
(jina linahifadhiwa) aliajiriwa kwa ajili ya mechi dhidi ya Mgambo
likiwa ni pendekezo la Tiboroha, lakini baadaye Kamati ya Mashindano
(baada ya kuwa imesababisha tatizo ndani ya Klabu), iligundua daktari
huyo alikuwa ni mwanachama tena mwenye kadi wa Simba, akaondolewa pia.
NGOMA
“Ngoma
alipewa taarifa na Tiboroha kwamba anatakiwa kwenda kufanya majaribio
na klabu moja nchini Uturuki. Tiboroha alifanya hivyo akijua Ngoma
alikuwa anakwenda kushiriki michuano ya Kombe la Mapinduzi, mbaya zaidi
hakuwa amewasiliana na kamati kabla kumfahamisha mchezaji.
“Baadaye
Kocha Mkuu (Hans Pluijm), alilalamika kwamba kufanya vile ilikuwa ni
kuondoa morali ya mchezaji, kocha alisema, Ngoma alicheza chini ya
kiwango katika michuano hiyo, akiamini Yanga inamzuia kusonga mbele
kimaisha.”
“BDF
ya Botswana iliazima dola 5,000(Sh10.7 milioni) ambazo hadi sasa
hazijarejeshwa. Kamati iligundua taarifa kuhusiana na deni hili, imekuwa
ikifichwa na hakuna maelezo mrejesho kuhusiana na hilo kutoka kwa
Tiboroha ambaye amekuwa na ukaribu na wahusika kutoka Botswana.”
AKAUNTI
“Hakufuata
ushauri aliopewa na wataalamu wa TRA, hali iliyosababisha akaunti za
Yanga kufungwa, hivyo mimi kulazimika kuanza kutoa fedha zangu za
mfukoni katika uendeshaji wa Klabu kwa kipindi chote na wakati huo
wachezaji walikuwa wakidai mishahara na tuko katikati ya msimu.
KUJIUZULU
“Nilitoa
ushauri kwamba vizuri akachukua hatua ya kujiuzulu mara moja na huenda
ingekuwa vizuri aeleze ana matatizo ya kifamilia pia kiafya, lengo
ilikuwa ni kumpa nafasi ya kuachana na Yanga kwa amani, lakini nilimtaka
ahakikishe zile fedha tunazowadai BDF kutoka Botswana, mara moja
zinawasilishwa klabuni na baada ya hapo, rasmi atakuwa
amejiondoa.Tiboroha alikubaliana na hilo na kuandika barua ya kujiuzulu
aliyoiwasilisha Januari 22, 2016.”
UTEUZI MPYA
Baraka
Deusdedit atashikilia nafasi hiyo ya Katibu Mkuu wa klabu. Omar Kaya
atachukua majukumu yanayohusiana na wanachama wa klabu.
CHANJI
Manji amepingana na wanachama wanaomshinikiza kumwondoa Mwenyekiti wa Kamati ya Mashindano Mhandisi Issac Chanji.
“Chanji?
Siwezi kumwondoa. Mimi namjua zaidi kuliko hao wanaosema atoke,
nimesikia kwamba wanasema nikikataa nitoke naye lakini mimi nasema
kwamba bado ni mtu ambaye natambua uchapaji kazi wake ndani ya hii
klabu, anaipenda hii klabu hivyo ataendelea kuwapo.”
UTETEZI
Tiboroha
aliliambia Mwanaspoti jana Jumapili kwamba hawezi kujibu tuhuma yoyote
kwa kukurupuka mpaka atakapokaa na kuzisoma kwa kina.
Ludewa yetu na maendeleo yetu
0 comments:
Post a Comment